Sveitarstjórnarfundur var haldinn 19. september 2022

Mánudaginn 19. september 2022 kom sveitarstjórn Kaldrananeshrepps saman til 4. fundar kjörtímabilsins á skrifstofu hreppsins í samkomuhúsinu Baldri á Drangsnesi.
Fundinn sátu þau Finnur Ólafsson, Ísabella Benediktsdóttir, Hildur Aradóttir, Arnlín Óladóttir og Franklín B. Ævarsson.


Oddviti setti fund kl. 21:00.
Hildur Aradóttir ritar fundargerð á tölvu.

Dagskrá 4. fundar:

  1. Fundargerð 3. sveitarstjórnarfundar 15.08.2022.
  2. Fundargerðir nefnda
  3. Aðrir fundir
  4. Samvinna sveitarfélaga á Vestfjörðum um barnaverndarþjónustu
  5. Rekstur umdæmisráðs á landsvísu
  6. Reglur um fjárhagsaðstoð barnaverndarnefndar
  7. Deiliskipulag Ásmundarness
  8. Umsóknir um starf helgarstarfsmanns við Sundlaugina á Drangsnesi
  9. Úttekt á brunaviðvörunarkerfi Grunnskóla Drangsness
  10. Eftirlitsskýrsla frá heilbrigðiseftirliti Vestfjarða
  11. Beiðni Karl Björnssonar, framkvæmdarstjóra Sambands íslenskra sveitarfélaga


Fundargerð:

  1. Fundargerð 3. sveitarstjórnarfundar 15.08.2022.
    Oddviti gerði grein fyrir afgreiðslu mála frá síðasta fundi.
    Fundargerð lögð fram til kynningar.
  2. Fundargerðir nefnda
    1. Fundur Bygginga-, skipulags- og umhverfisnefndar 19.09.2022.
      Fundargerð lögð fram til kynningar. Sveitarstjórn staðfestir ákvörðun Byggingar,-skipulags- og umhverfisnefndar þann 19.09.2022 að aðalskipulagi Kaldrananeshrepps verði breytt í samræmi við tillögu að deiluskipulagi svæðisins í landi Ásmundarness.
      Náttúrulegar aðstæður gera það að verkum að ekki er unnt að uppfylla fjarlægðarkröfu skipulagsreglugerðar frá stofn- og tengivegum og í ljósi þess að Vegagerð gerir ekki athugasemd við deiliskipulag Ásmundarness. Fer sveitarstjórn því fram á undanþágu frá ákvæði reglugerðar nr. 5.3.2.5. um fjarlægð mannvirkja frá vegum.
      Sveitarstjórn staðfestir að sótt verði um undanþágu um fjarlægð frá stofn- og tengivegum á grundvelli undanþáguheimilda í reglugerð og felur þjónustufulltrúa að bregðast við.
      Borið upp og samþykkt samhljóða.
    2. Fundur Fjallskilanefndar 06.09.2022.
      Fundargerð lögð fram til kynningar. Sveitarstjórn staðfestir.
  3. Aðrir fundir
    1. Heilbrigðiseftirlit Vestfjarða, 139. fundur heilbrigðisnefndar, 01.09.2022.
      Fundargerð lögð fram til kynningar. Sveitarstjórn staðfestir.
    2. Aðalfundur Sorpsamlags Strandasýslu, 29.08.2022
      Fundargerð lögð fram til kynningar. Sveitarstjórn staðfestir.
    3. Fundargerð 19. Samráðsfundar Sambands íslenskra sveitarfélaga, 16.08.2022.
      Fundargerð lögð fram til kynningar. Sveitarstjórn staðfestir.
    4. Fundargerð stjórnar Byggðasamlags Vestfjarða, 01.09.2022.
      Fundargerð lögð fram til kynningar. Sveitarstjórn staðfestir.
    5. Fundargerð stjórnar Sorpsamlags Strandasýslu, 07.09.2022.
      Fundargerð lögð fram til kynningar. Sveitarstjórn staðfestir.
    6. Samband íslenskra sveitarfélaga, 912. fundur stjórnar, 26.08.2022.
      Fundargerð lögð fram til kynningar. Sveitarstjórn staðfestir.

  4. Samvinna sveitarfélaga á Vestfjörðum um barnaverndarþjónustu
    Lög um breytingar á barnaverndarlögum nr. 80/2002 tóku í gildi í lok maí þessa árs en helstu breytingar þess eru að umdæmi barnaverndarþjónustu skal vera í það minnst 6.000 íbúar og hafa yfir að skipa sérhæfðu starfsfólki í það minnsta tveim stöðugildum. Að auki þarf að hafa aðganga að félagsráðgjafa, sálfræðingi, lögfræðingi og einum starfsmanni með annars konar uppeldismenntun.

    Tillaga er um sameiginlegt teymi barnaverndarþjónustu á Vestfjörðum þar sem félagsmálastjórar félagsþjónustusvæðanna eiga sæti, sem og deildarstjórar eða starfsmenn barnaverndar eftir atvikum.

    Tillaga lögð fram til kynningar.
    Sveitarstjórn ákveður að taka til frekari skoðunar barnaverndarþjónustu sveitarfélaga á Vestfjörðum.
    Borið upp og samþykkt.

  5. Rekstur umdæmisráðs barnaverndar á landsvísu
    Kaldrananeshreppi barst drög að samningi um umdæmisráð barnaverndar sem unnið hefur verið að í samvinnu við önnur sveitarfélög, ráðuneyti og Samband íslenskra sveitarfélaga. Að auki barst erindisbréf valnefndar og viðauki við samning vegna stofnunar og starfsemi umdæmisráðs barnaverndar.

    Drög, erindisbréf og viðauki lagt fram til kynningar.
    Sveitarstjórn Kaldrananeshrepps samþykkir drög að samningi um rekstur umdæmisráðs barnaverndar á landsvísu ásamt viðauka.
    Sveitarstjórn Kaldrananeshrepps vill benda á launakjör ráðsmanna eru há miðað við laun sérfræðinga almennt, s.s. starfandi lögfræðinga hjá hinu opinbera.
    Sveitarstjóra falið að undirrita samning fyrir hönd hreppsins.

  6. Reglur um fjárhagsaðstoð barnaverndarnefndar
    Reglur um veitingu fjárstyrks til greiðslu lögmannsaðstoðar sbr. 47 gr. barnaverndarlaga nr. 80/2002 eru lagðar fram til kynningar.

    Sveitarstjórn samþykkir fyrirliggjandi reglur.
    Þjónustufulltrúa falið að upplýsa félagsmálastjóra.
    Borið upp og samþykkt.

  7. Deiliskipulag Ásmundarness
    Kaldrananeshreppi barst umsagnir vegna breytingu á aðalskipulagi Kaldrananeshrepps 2010-2030 og nýtt deiliskipulag Ásmundarness.

    Sveitarstjórn vísar til liðar 2.a. í fundargerðinni.

    „ Sveitarstjórn staðfestir ákvörðun Byggingar,-skipulags- og umhverfisnefndar þann 19.09.2022 að aðalskipulagi Kaldrananeshrepps verði breytt í samræmi við tillögu að deiluskipulagi svæðisins í landi Ásmundarness.
    Náttúrulegar aðstæður gera það að verkum að ekki er unnt að uppfylla fjarlægðarkröfu skipulagsreglugerðar frá stofn- og tengivegum og í ljósi þess að Vegagerð gerir ekki athugasemd við deiliskipulag Ásmundarness. Fer sveitarstjórn því fram á undanþágu frá ákvæði reglugerðar nr. 5.3.2.5. um fjarlægð mannvirkja frá vegum.
    Sveitarstjórn staðfestir að sótt verði um undanþágu um fjarlægð frá stofn- og tengivegum á grundvelli undanþáguheimilda í reglugerð og felur þjónustufulltrúa að bregðast við.“

    Borið upp og samþykkt samhljóða.

  8. Umsóknir um starf helgarstarfsmanns við Sundlaugina á Drangsnesi
    Kaldrananeshreppur auglýsti eftir starfi helgarstarfsmanns við Sundlaugina á Drangsnesi þann 24.08.2021 á vefsíðu hreppsins og samfélagsmiðlinum Facebook.

    Helstu verkefni eru skilgreind sem :
    - Öryggisgæsla við sundlaug
    - Afgreiðslustörf
    - Aðstoð við viðskiptavini
    - Þrif

    Hreppnum barst ein umsókn vegna umrædds starfs.
    Sveitarstjórn staðfestir ráðningu.
    Borið upp og samþykkt samhljóða.

  9. Úttekt á brunaviðvörunarkerfi Grunnskóla Drangsness
    Þann 31. ágúst síðast liðinn var gerð úttekt vegna brunaviðvörunarkerfis Grunnskóla Drangsness. Stuðst var við leiðbeiningar nr. 6.038 um sjálfvirka brunaviðvörun frá Húsnæðis- og mannvirkjastofnun.

    Úttektin greinir frá því að kerfið var allt yfirfarið og boðsendingar til stjórnstöðvar prófaðar. Mörg slökkvitæki eru komin á aldur og ekki loga öll neyðarljós.

    Úttekt lögð fram til kynningar.
    Oddvita falið að bregðast við.
    Sveitarstjórn staðfestir.

  10. Eftirlitsskýrsla frá heilbrigðiseftirliti Vestfjarða
    Eftirlitsskýrsla Heilbrigðiseftirlits Vestfjarða lögð fram til kynningar og umræðu þar sem við á.

    Eftirlitsskýrsla vatnsveitunnar á Drangsnesi greinir frá því að sýni úr eldhúsi veitingarstaðarins Malarhorns var tekið. Sýnið stenst kröfur neysluvatnsreglugerðar 536/2001.

    Skýrsla lögð fram til kynningar.

  11. Beiðni Karls Björnssonar, framkvæmdarstjóra Sambands íslenskra sveitarfélaga
    Á fundi stjórnar Sambands íslenskra sveitarfélaga sem haldinn var 26. ágúst 2022 var lagt fram minnisblað lögfræði- og velferðarsviðs sambandsins um ramma að samkomulagi um samræmda móttöku flóttafólks.

    Stjórn sambandsins hvetur sveitarstjórnir til þess að kynna sér efni samkomulagsins og taka afstöðu til þess hvort sveitarfélögin geti tekið þátt í þessu mikilvæga samfélagslega verkefni.

    Beiðni lögð fram til kynningar.

Fleira ekki tekið fyrir. Fundargerð lesin upp og samþykkt.
Fundi slitið klukkan 22:15.

Opinn fundur vegna vinnu við Menntastefnu Vestfjarða

Þriðjudaginn 4. október nk. verður haldinn opinn fundur vegna vinnu við Menntastefnu Vestfjarða.
Fundurinn er frá 14.00 til 17.00 og verður haldinn í Grunnskólanum á Hólmavík. 

Léttar veitingar & kaffi verða í boði. 


Fundurinn er opinn öllum og hvetjum við alla sem hafa áhuga á því að koma að vinnu við Menntastefnu Vestfjarða að mæta. 

Fjallskilaseðill og réttir 2022

Kaldrananeshreppur hefur nú gefið út fjallskilaseðil fyrir árið 2022 og er hann birtur hér. 


Seðillinn verður einnig hengdur upp í Búðinni á Drangsnesi en vegna umhverfissjónarmiðs verður hann ekki sendur í hús. 


Samþykkt var á fundi Fjallskilanefndar að fyrri leitir fari fram föstudaginn 23. september og réttað verður laugardaginn 24. september. 

Allir eru velkomnir að koma og hjálpa til við leitir, njóta góðrar útivistar í fallegu umhverfi og góðum félagsskap. 

 

Fjallskilaseðill_2022.pdf

Starfsmaður óskast við Sundlaugina á Drangsnesi

Sundlaugin á Drangsnesi óskar eftir starfsmanni aðra hvora helgi.
Vinnutími er á föstudögum frá 14.30 til 19.00, laugardögum & sunnudögum frá 12.30 til 18.00. 

Gerð er krafa á því að umsækjendur séu 18 ára eða eldri. 

Helstu verkefni og ábyrgð :
- Öryggisgæsla við sundlaug 
- Afgreiðslustörf 
- Aðstoð við viðskiptavini 
- Þrif 

Hæfniskröfur : 
- Rík þjónustulund og jákvæðni
- Sjálfstæð vinnubrögð
- Reynsla af sambærilegu starfi er kostur 

Umsóknum skal senda á netfangið This email address is being protected from spambots. You need JavaScript enabled to view it..
Allar nánari upplýsingar veitir oddviti, Finnur Ólafsson í síma 775-3377

Sveitarstjórnarfundur var haldinn 17. ágúst 2022

Miðvikudaginn 17. ágúst 2022 kom sveitarstjórn Kaldrananeshrepps saman til 3. fundar kjörtímabilsins á skrifstofu hreppsins í samkomuhúsinu Baldri á Drangsnesi.
Fundinn sátu þau Finnur Ólafsson, Halldór Logi Friðgeirsson, Hildur Aradóttir, Arnlín Óladóttir og Franklín Steindór B. Ævarsson.


Oddviti setti fund kl. 20:00.
Hildur Aradóttir ritar fundargerð á tölvu.

Dagskrá 3. fundar:

  1. Fundargerð 2. sveitarstjórnarfundar 03.07.2022.
  2. Fundargerðir nefnda
  3. Aðrir fundir
  4. Skólaárið 2022-2023 & rætt við skólastjóra
  5. Beiðni um sumarhúsalóð í hreppnum
  6. Umsókn um leiguíbúð í hreppnum
  7. Eftirlitsskýrsla frá heilbrigðiseftirliti Vestfjarða
  8. Erindi Steinars Braga
  9. Beiðni Íþróttasambands lögreglumanna
  10. Beiðni Blindrafélagsins

Fundargerð:

  1. Fundargerð 2. sveitarstjórnarfundar 03.07.2022.
    Oddviti gerði grein fyrir afgreiðslu mála frá síðasta fundi.
    Fundargerð lögð fram til kynningar.

  2. Fundargerðir nefnda
    Engar fundargerðir lágu fyrir.

  3. Aðrir fundir
    1. Ársfundur fulltrúaráðs Vestfjarðastofu, 14.06.2022.
      Fundargerð lögð fram til kynningar. Sveitarstjórn staðfestir.
    2. 45. stjórnarfundur Vestfjarðastofu og Fjórðungssambands Vestfirðinga, 27.04.2022.
      Fundargerð lögð fram til kynningar. Sveitarstjórn staðfestir.
    3. 46. stjórnarfundur Vestfjarðastofu og Fjórðungssambands Vestfirðinga, 01.06.2022.
      Fundargerð lögð fram til kynningar. Sveitarstjórn staðfestir.
    4. Framhaldsársfundur Vestfjarðastofu, 28.04.2022.
      Fundargerð lögð fram til kynningar. Sveitarstjórn staðfestir.
    5. Samband íslenskra sveitarfélaga, 910. fundur stjórnar, 20.05.2022.
      Fundargerð lögð fram til kynningar. Sveitarstjórn staðfestir
    6. Samband íslenskra sveitarfélaga, 911. fundur stjórnar, 23.06.2022.
      Fundargerð lögð fram til kynningar. Sveitarstjórn staðfestir

  4. Skólaárið 2022-2023 & rætt við skólastjóra
    Rætt var við Ástu Þórisdóttur sem hefur tekið við sem nýr skólastjóri Grunnskóla Drangsness. Farið var yfir skólaárið 2022-2023, nemendaskrá annarinnar og komandi verkefni.

    Sveitarstjórn Kaldrananeshrepps þakkar Guðnýju Rúnarsdóttur, fyrrum skólastjóra fyrir vel unnin störf í þágu sveitarfélagsins og óskar henni alls velfarnaðar í framtíðinni.

  5. Beiðni um sumarhúsalóð í hreppnum
    Sveitarstjórn barst beiðni um sumarhúsalóð í hreppnum en óskað var eftir því að fá leigða lóð nr. 5 í landi Klúku undir sumarhús.

    Beiðni lögð fyrir.
    Sveitarstjórn samþykkir að úthluta lóð nr. 5 og felur þjónustufulltrúa að ganga frá lóðareigusamningum.
    Borið upp og samþykkt.

  6. Umsókn um leiguíbúð í hreppnum
    Hreppnum barst umsókn þar sem óskað var eftir leiguíbúð í hreppnum.
    Þjónustufulltrúa falið að útbúa leigusamning.

  7. Eftirlitsskýrsla frá heilbrigðiseftirliti Vestfjarða
    Eftirlitsskýrsla Heilbrigðiseftirlits Vestfjarða lagðar fram til kynningar og umræðu þar sem við á.

    Eftirlitsskýrsla Gvendarlaugar hins góða greinir frá því að sýni úr pottinum sem staðsettur við hliðin á lauginni var tekið. Að auki var tekið sýni úr lauginni sem stenst gæðakröfur reglugerðar um baðstaði í náttúrunni nr. 460/2015 en laugin er tæmd alla þriðjudaga og þvegin með háþrýsti dælu.

    Sýni sem tekið var úr Sundlauginni á Drangsnesi stenst kröfur skv. sundlaugareglugerð nr. 810/2010. Klórblöndun er í góðu lagi og gestafjöldi hefur verið skráður. Merkingar eru allar til staðar en athuga þarf merki sem bannar dýfingar fyrir ofan dúkrúllu á húsi en það er óskýrt.

    Skýrsla lögð fram til kynningar.

  8. Erindi Steinars Braga
    Sveitarstjórn Kaldrananeshrepps barst erindi frá Steinari Braga þar sem hann fer yfir skort á öryggis- og þjónustumerkingum hér í hreppnum. Skortur er á hraðamerkingum á Drangsnesi en hvorki er að finna merkingar við aðkomu inn í bæinn frá þjóðvegi 645 né innan bæjarins. Einnig vantar merkingu á staðsetningu tjaldsvæði Drangsnesar.

    Að auki nefnir hann möguleikann á því að gefa sögu hreppsins merkari sess. Mörg hús við Aðalbraut hafa merka sögu og þýðingu í augum núverandi og fyrrverandi íbúa en meðal þeirra húsa eru til dæmis gamla bókasafnið, gamla kaupfélagið og gamla símstöðin.

    Það myndin gefa bænum ákveðinn blæ að mögulega setja upp ýmis skilti með myndum af lífi í þorpinu hér áður fyrr og gæti Drangsnes orðið enn eftirsóknarverðri ferðamannastaður.

    Erindi lagt fyrir.
    Sveitarstjórn þakkar góðar ábendingar og tekur þær til skoðunar.
    Vegagerðin endurnýjaði öll umferðarmerki nú í ágúst að öðru leiti vísum við þessum góðu ábendingum til viðeigandi aðila.
    Borið upp og samþykkt.

  9. Beiðni Íþróttasambands lögreglumanna
    Hreppnum barst fyrirspurn frá Íþróttasambandi lögreglumanna sem hefur staðið fyrir umferðarfræðslu fyrir yngstu nemendurna í skólum landsins undanfarin ár undir yfirskriftinni „Í umferðinni“.

    Kannaður er áhugi sveitarfélagsins fyrir því að styrkja verkefni þeirra með frjálsu framlagi eða kaupa merki sveitarfélagsins sem myndi prýða bæklinginn að upphæð kr. 30.000.

    Beiðni lögð fyrir.
    Sveitarstjórn ákveður að samþykkja ekki beiðni sambandsins.
    Borið upp og samþykkt.

  10. Beiðni Blindrafélagsins
    Hreppnum barst fyrirspurn frá Blindrafélaginu þar sem athugað er hvort áhugi væri fyrir því að kaupa styrktarlínu að upphæð kr. 5.000 eða kaupa merki sveitarfélagsins að upphæð kr. 18.000.

    Með því væri hreppurinn að styrkja Blindrafélagið við útgáfu rits þeirra, Víðsjá sem kemur út í lok ágúst. Víðsjá er gefin út í 12.000 eintökum og er dreift til félagsmanna, styrktarfélaga, bakhjarla og annarra sem stutt hafa félagið á síðastliðnum tveimur árum.

    Beiðni lögð fyrir.
    Sveitarstjórn ákveður að samþykkja ekki beiðni Blindrafélagsins.
    Borið upp og samþykkt.

Fleira ekki tekið fyrir. Fundargerð lesin upp og samþykkt.
Fundi slitið klukkan 21:51